ചാരെ

ഗൃഹാതുരമാം ഓർമ്മകളും പേറി

പ്രിയരാം കൂട്ടുകാരവിടെയെത്തീ

അമ്മിഞ്ഞപ്പാലിൻ മണം തേടി വീണ്ടും

അമ്മതൻ മടിത്തട്ടിലണഞ്ഞെന്ന പോലെ

അറിവിൻ മധുനുകർന്നൊരാ വിദ്യാലയ

മുറ്റത്തെല്ലാം മറന്നവർ ഒത്ത്‌ കൂടീ..

തുളുമ്പും മാതൃ ഹൃദയവുമായത്‌ കണ്ട്‌

ഗുരു ഗണങ്ങളും ചാരെയെത്തീ..

ആനന്ദാശ്രു കണങ്ങളാലവരുടെ

കണ്ണുകൾ ഈറനണിഞ്ഞു നിന്നൂ..

ഓർമ്മകൾ രണ്ടു പതിറ്റാണ്ടു പിന്നിലേ-

ക്കറിയാതെയൊന്ന് പാളിനോക്കീ..

പറയണമെന്തെന്നറിയാതെ ഏവരും നിറ

മിഴികളാൽ മൗനത്തിൻ കഥ പറഞ്ഞൂ..

പ്രായത്തിലൊളിപ്പിച്ച പഴയ കുസൃതികൾ മെല്ലെ 

പുഞ്ചിരി തൂകിയടുത്ത്‌ വന്നൂ..